«Milli Məclis».-2009.-¹1.-S.62-65.
Azərbaycanın diaspor siyasəti
"Azərbaycan Respublikası bütün dünya
azərbaycanlılarının dayaq və cazibə
mərkəzidir, onların ümid və
məhəbbətlə baxdığı müqəddəs
bir yerdir. Buna görə də bütün
azərbaycanlılar müstəqil dövlətimizin
ətrafında daha sıx birləşmiş
Azərbaycanın azad, firavan, daha da güclü,
qüdrətli olması üçün mümkün olan
hər şeyi etməlidirlər".
Heydər Əliyev
Gülər Əhmədova,
Millət
vəkili,
Dünya
Azərbaycanlıları Konqresinin İdarə Heyətinin
üzvü
Ümummilli lider Heydər Əliyev
və hazırkı dövlət başçısı
İlham Əliyevin səyləri sayəsində
Azərbaycanın dünyada geosiyasi əhəmiyyətinin
durmadan artması, regionda öncül mövqeyə
çıxması, siyasi-iqtisadi və mədəni sahələrdə
uğurlar qazanması bu gün hamılıqla etiraf olunur.
Azərbaycan dövlətçiliyinin inkişafında,
səmərəli neft strategiyasının həyata
keçirilməsində, ardıcıl xarici siyasət
xəttinin yürüdülməsində, ölkənin davamlı
inkişafının, təmin olunmasında bu liderlərin
müstəsna rolu haqqında çox deyilmiş, çox
yazılmışdır. Bununla belə onların siyasi
quruculuq fəaliyyətinin çox mühüm bir
istiqaməti – Azərbaycan
millətinin diaspor təşkilatlarında
birləşdirilməsi kimi böyük iş isə yetərincə
tədqiq və təbliğ edilməmişdir. Halbuki hər
iki liderin fəaliyyətində bu faktor müstəsna əhəmiyyətə
malikdir. Diaspor siyasətinin Azərbaycanın taleyüklü
məsələlərinin həllində üstün rolu
danılmazdır.
Cəmi
15 il əvvəl "Azərbaycan diasporu", həmçinin
"Azərbaycan lobbisi"
anlayışları ciddi qəbul edilmir, reallığı
əks etdirmirdi. Azərbaycanın potensial diaspor ehtiyatlan
hər zaman sanballı çəkiyə (40 milyondan artıq)
malik olsa da, bizim etnomədəni və
siyasi cəhətdən diaspor təşkilatlarımız yox
dərəcəsində idi.
Prezidentliyinin
ilk illərində Heydər Əliyevin gəldiyi qənaət
diqqətəlayiqdir: "Mən xarici ölkələrə
səfər edir və diasporu toplamaq istəyirəm. Mən
Amerikada onu bir araya topladım. Çikaqoda cəmi 35
nəfər gəldi. Bir neçə dəfə Parisdə,
Londonda onları toplamışam. 35-40 nəfərdən
artıq adam olmur. Bu diaspordurmu?"
H. Əliyev
MDB dövlət başçıları arasında ilk olaraq
istər dövlətlərarası münasibətlərin
inkişafı baxımından, istərsə də gənc
dövlətimizin üzləşdiyi bir çox
problemlərin həllində diasporun olduqca böyük əhəmiyyət
kəsb etdiyini layiqincə qiymətləndirmişdir. O,
özünəməxsus uzaqgörənliklə çoxmilyonluq Azərbaycan diasporu ilə
işi dövlət siyasəti səviyyəsinə
qaldırdı. Transsərhəd milli
həmrəylik faktorunu ölkənin
ictimai inkişafının ideologiyası və mədəni
dayaqlarından birinə çevirməklə, diaspor
resurslarından fəal şəkildə istifadə
olunması üçün lazım olan hər şeyi etdi.
Eyni zamanda milli özünüdərkin və azərbaycançılıq
məfkurəsinin inkişafına yönəldilmiş
dövlət siyasəti nəinki diaspor səylərinin
əlaqələndirilməsini, həmçinin
təşkilatlanmanın ilkin mərhələləri
üçün səciyyəvi olan qeyri-sağlam rəqabəti,
dar siyasi düşüncə meyillərinin
aradan qaldırılmasını nəzərdə tuturdu.
Müstəqilliyin ilk
günlərindən Ermənistanın hərbi
təcavüzünə məruz qalan və informasiya
blokadasında olan gənc dövlətimizin
təşkilatlanmış güclü bir diasporunun olması
istər gündəlik problemlərin həllində istərsə
də uzunmüddətli perspektiv layihələrin icrasında
böyük əhəmiyyət kəsb edirdi. H. Əliyev
hələ 1991-ci ildə Naxçıvan Ali Məclisinin
sədri olarkən, 1 dekabr tarixini Dünya azərbaycanlıların
həmrəylik günü elan etməklə, əslində
azərbaycanlıların birləşməsi yolunda yeni bir ənənənin
əsasını qoymuşdur.
Prezident olduqdan sonra H. Əliyev
diaspor təşkilatlarının birləşdirilməsi
problemini dövlət siyasətinin prioritet
istiqamətlərindən birinə çevirdi. Diasporumuzun təşkilatlanması,
onun ölkələr və xalqlar arasında münasibətlərdə
vasitəçi ola biləcək elit
təbəqəsinin formalaşması istiqamətində real
addımlar atıldı.
24 dekabr 1998-ci ildə H. Əliyev
dünya azərbaycanlılarına müraciət ünvanladı. Müraciətdə
Azərbaycanın müstəqilliyinin dönməzliyini təmin
etməyə çağırış səsləndirdi.
H. Əliyevin hakimiyyəti
dövründə Azərbaycan diasporunun təşkilatlanması
işi daim diqqətdə olmuş, qısa müddətdə
nəzərə çarpacaq uğurlar əldə
edilmişdir. 1-ci ilin noyabr ayında Bakıda
keçirilmiş Dünya Azərbaycanlılarının I
Qurultayı bunun təsdiqidir. Qurultay azərbaycançılıq
ideyasının gerçəkləşməsi və
çoxsaylı diasporun həqiqi bir qüvvəyə
çevrilməsinin əsasını qoymuş oldu.
Qurultayın işində dünyanın 36 ölkəsindən
1153 nümayəndə iştirak edirdi. Qurultayda rəhbər
orqanına ölkə Prezidentinin də seçildiyi Diasporla
İş üzrə Xüsusi Əlaqələndirmə
Şurası təsis olundu. Qurultaydan dərhal sonra H. Əliyevin
fərmanı ilə Xaricdə Yaşayan
Azərbaycanlılarla İş üzrə Dövlət
Komitəsi yaradıldı. 2002-ci ilin dekabr ayında isə
"Xaricdə yaşayan azərbaycanlılarla əlaqədar
dövlət siyasəti haqqında" Qanun qəbul edildi.
Dövlətin bu addımları dünya azərbaycanlılarının
təşkilatlanması və mənəvi birləşməsi
prosesini sürətləndirdi, tarixi vətənləri
ilə onların əlaqələrinin genişlənməsini
təmin etdi, ölkə-mizin tarixi və bugünkü
reallıqlarının dünya ictimaiyyətinə çatdırılmasına
imkan verdi.
Ölkə
Prezidenti İlham Əliyevin həyata keçirdiyi
məqsədyönlü diaspor siyasəti dünya
azərbaycanlılarının öz milli ləyaqətinin dərk
olunması işinin güclənməsinə, müxtəlif
ölkələrdəki Azərbaycan icmalarının
təşkilatlanma və fəallığının
yüksəlməsinə, həmvətənlərimizin tarixi
vətənləri ilə əlaqələrinin
möhkəmlənməsinə, Azərbaycanın lobbi
təşkilatlarının formalaşmasına ciddi təsir
göstərdi. 2006-cı ilin martında Bakıda
keçirilmiş Dünya Azərbaycanlılarının II
Qurultayı bu siyasətin uğurlarının ən bariz
sübutudur. Qurultayın işində 49 ölkədən 1218
nümayəndə iştirak edirdi. Qurultayda diaspor fəaliyyətinin
yeni konsepsiyasının hazırlanması, Amerika və Asiya
Azərbaycanlıları Konqresinin təsis olunması,
Ümumdünya Azərbaycanlıları
Təşkilatının və geniş mədəni-maarif
müəssisələri şəbəkəsinin
yaradılması haqqında qərarlar qəbul edildi. Prezident
İlham Əliyev qurultayda çıxış edərək
dedi: "Dünya azərbaycanlılarının qurultayı mühüm
tarixi hadisədir... Əlli milyonluq Azərbaycan xalqı öz
qüvvəsini nümayiş etdirdi. Biz böyük xalqıq,
böyük qüvvəyik".
Bu forum
diasporun bir təsisat olaraq tanınmasına və
birləşməsinə yeni təkan verdi, Azərbaycanın
lobbi təşkilatlarının yaranmasında mühüm rol
oynadı. 2006-cı ildə Antalyada dünyadakı
Azərbaycan və türk icmalarının iclası
keçirildi. Görüşdə Azərbaycan və türk
lobbi təşkilatlarının əlbir fəaliyyət planı
işlənib hazırlandı. Həmin günlərdə
elə orada Azərbaycan ziyalılarının Ümumdünya
forumu və Türkiyədəki Azərbaycan
Təşkilatlarının qurultayı keçirildi.
2007-ci
ildə Amerikadakı Azərbaycan təşkilatlarının
qurultayı, dünya azərbaycanlıları ziyalılarının
görüşü təşkil edildi. Məqsəd diaspor
elitasının gücünün səfərbər
olunması idi. Diaspor əlaqələrinin
intensivləşdirilməsi və Azərbaycan lobbisinin
yaradılması məqsədilə Prezident İlham
Əliyevin təşəbbüsü ilə xüsusi
fəaliyyət proqramı da hazırlandı.
2008-ci ilin 6-7 iyul tarixində Almaniyada
Dünya Azərbaycanlıları Konqresinin Qurultayı
keçirildi. Qurultayda Sabir Rüstəmxanlı
(Azərbaycan) və Firudin Pərvizniya
(Almaniya) həmsədr, İsmayıl Ağayev, Gülər
Əhmədova, Vaqif Arzumanlı, Səftər
Rəhimli (Azərbaycan); Məhəmməd Müştaq
(Türkiyə); Nurəddin Qərəvi, Fərəmərz Quluzadə,
Hüseyn Vüsuqi, Əjdər Tağızadə,
Nadir Hollenbrand, Səməd Fərtaş (Avropa); Mirəşrəf
Fətiyev, Abuzər Bağırov,
Rəhman Abbasov, Tahir Hacıyev (Rusiya) DAK İdarə Heyətinə üzv
seçildilər. DAK İdarə
Heyətinin qərarı ilə ölkə
nümayəndəlikləri təsis olundu, İsmayıl
Ağayev Azərbaycan, Mirəşrəf Fətiyev isə Rusiya nümayəndəliyinin
sədrləri seçildilər.
DAK
İdarə Heyətinin qərarı ilə Azərbaycanda
və Azərbaycandan kənarda bir sıra mühüm
tədbirlər həyata keçirilmişdir.
Qeyd
olunmalıdır ki, DAK Azərbaycan
nümayəndəliyi türkdilli dövlətlərin
siyasətinə dəstək fondunun
təşkilatçılığı ilə birgə
Bişkekdə Ümummilli lider Heydər Əliyevin 85, Mircəlal Paşayevin 100 illiyinə həsr
olunmuş elmi-praktik konfranslar keçirilmişdir. Həmin
tədbirlərdə Azərbaycandan elm və
incəsənət xadimləri, o cümlədən dünya
şöhrətli yazıçı Çingiz Aytmatov və SSRİ xalq artisti, kinorejissor Polad
Şəmsiyev və başqaları
iştirak etmişdilər.
Dünya
Azərbaycanlıları Konqresinin Azərbaycan
nümayəndəliyi Səbayel bələdiyyəsi ilə
birlikdə Nuru Paşanın komandanlığı ilə
Qafqaz İslam Ordusunun Azərbaycanın daşnak
təcavüzündən qurtulmasının 90 illiyinə
həsr olunmuş elmi-praktik konfrans keçirmişdir. Bizim
dəvətimizlə həmin tədbirə
Türkiyədən Ənvər Paşanın nəvəsi
Arzu Ənvər də təşrif buyurmuşdu. Konfransda
qərara alındı ki, "Nuru Paşa"
Fondu yaradılsın. Fondun əsas məqsədi
Türkiyə-Azərbaycan münasibətlərində yeni
mərhələyə təkan verə biləcək tarixi
araşdırmaların aparılması, Çanaqqala
savaşında şəhid olmuş azərbaycanlıların
xatirəsini əbədiləşdirmək istiqamətində
bir sıra tədbirlərin görülməsi idi.
Gördüyümüz
işlərdən biri də vətəndən kənarda
yaşayan azərbaycanlıları və digər diaspora
nümayəndələrini Quba məzarlığına
dəvət edərək onları tarixin acı
həqiqətləri ilə tanış etmək olub.
Erməni daşnakları tarixin müxtəlif
mərhələlərində azərbaycanlılara qarşı
soyqırım siyasəti yeridib, dinc
əhaliyə divan tutub, onları yaşadıqları
tarixi-etnik torpaqlarından məcburi sürgün ediblər. Bu
həqiqətləri geniş auditoriyaya, o cümlədən
rusdilli auditoriyaya çatdırılması üçün DAK İdarə Heyətinin üzvü olaraq
mənim, Beynəlxalq Diaspora Mərkəzinin sədri
İsmayıl Ağayevin və S. Sarallının
müəllifi olduğumuz "Oğurlanmış tarix, soyqırım" (rus dilində: "Óêpaäåííàÿ èñòîðèÿ, ãåíîöèä") kitabının təqdimat
mərasimi təşkil edildi.
Ümummilli
lider Heydər Əliyevin başlamış olduğu və
Azərbaycan Respublikası Prezidenti İlham Əliyevin
uğurla davam etdirdiyi diaspor siyasəti bu gün öz
uğurlu bəhrələrini verməkdədir.
Təkcə
onu demək kifayətdir ki, bu günə kimi 312 diaspor
təşkilatı rəsmən qeydə
alınmışdır. Onların institusional
qeydiyyatı, səylərinin əlaqələndirilməsi
və birləşməsi işi davam etməkdədir. Diaspor
güclü iqtisadi, mədəni, intellektual gücə
malikdir. MDB ölkələrində, Türkiyə, İran,
Avropa və Amerikada olan Azərbaycan icmaları isə daha
səmərəli fəaliyyət göstərirlər.
Prezident İlham Əliyevin qeyd etdiyi kimi, indi
"azərbaycanlıların həmrəyliyinin
möhkəmləndirilməsi və təşkilatlanması
üçün, ümummilli ideyalar ətrafında onların
birləşməsi üçün daha geniş imkanlar yaranmışdır".
Azərbaycan
dövləti nüfuzlu iqtisadi və siyasi bir qüvvəyə
çevrilmişdir. Bütün dünyada yaşayan
həmvətənlərimiz üçün gözəl perspektivlər açılmışdır.
Prezidentin fikrincə, biz diaspor siyasətimizdə yeni
mərhələyə qədəm qoymuşuq. Bu siyasət keyfiyyətcə
yeni məzmun kəsb edərək, qarşımızda bu
məqsədləri qoyur:
- yaşadıqları
ölkələrin siyasi ə iqtisadi həyatına
Azərbaycan icmalarının təsirinin gücləndirilməsi;
-
dünyanın aparıcı ölkələrində nüfuzlu
Azərbaycan lobbisinin formalaşdırılması;
- dost
lobbi və icmalarla fəal əməkdaşlıq
yaradılması;
-
Azərbaycanlıların milli-mənəvi dəyərlərinin
və adət-ənənələrinin təbliği
üçün müntəzəm tədbirlərin həyata
keçirilməsi;
-
"Azərbaycanın dostları" və "Azərbaycan evi" beynəlxalq klublarının,
mədəniyyət mərkəzlərinin yaradılması;
-
Azərbaycanın iqtisadi və mədəni həyatında
həmvətənlərimizin real iştirakının
təmin olunması;
-
Azərbaycan həqiqətlərinin bütün dünyaya
çatdırılması və erməni
təbliğatının iç üzünün ifşa
olunmasında diasporun fəaliyyətinin
gücləndirilməsi;
-
tariximizin və mədəni irsimizin
saxtalaşdırılması cəhdlərinin qarşısının
alınması;
-
Azərbaycanın müvafiq dövlət və
təşkilatları ilə diaspor icmalarının
fəaliyyətinin əlaqələndirilməsi.
Bu
vəzifələr Azərbaycanın artmaqda olan siyasi və
iqtisadi imkanları və ölkənin üzləşdiyi problemlərin
birlikdə aradan qaldırılması zərurətini
qarşıya qoyur. Bir zaman rəqabət aparmaq iqtidarında
olmaq və inkişaf etmək üçün Azərbaycan
qloballaşma şəraitində nəinki qlobal siyasi və
iqtisadi proseslərə fəal surətdə inteqrasiya
etməli, həm də beynəlxalq birliyin nüfuzlu
üzvü olmalıdır. Prezident İlham Əliyevin bu
gün qarşıya qoyduğu bu geniş miqyaslı və
çətin vəzifə elitamızdan öz intellektual qabiliyyətini
və siyasi iradəsini bir yerə cəmləməyi, bu
vəzifənin həyata keçirilməsində
cəmiyyətin iştirakının təmin olunması
üçün milli strategiyanın işlənib
hazırlanmasını tələb edir.
Bu halda
diaspor elitasının rolu prinsipcə olduqca vacibdir. Bir
tərəfdən o, Azərbaycanın digər ölkələrdə
praktiki həyat təcrübəsi mənimsəməsinə
kömək edir, digər tərəfdən də
dövlətimizin xaricdə maraqlarının qorunmasında
mühüm rol oynayır. Diaspor təşkilatları
Azərbaycanın, azərbaycanlıların müsbət
imicinin formalaşdırılmasına, ümummilli
ideyaların reallaşdırılmasına yardım etməli,
cəmiyyətimizin müxtəlif qruplarının
mürəkkəb beynəlxalq ünsiyyət
proseslərinə cəlb olunmasına şərait
yaratmalıdır.
Bir sözlə, Azərbaycan milli
və dövlət maraqlarının eyni şəkildə uğurlu
inkişafı dövlətlə çoxmilyonluq
diasporun hərtərəfli qarşılıqlı fəaliyyətindən
asılıdır. Ölkənin müasir dünyaya uğurlu
siyasi və iqtisadi inteqrasiyasının əsasını bu
təşkil edir. Prezident İlham Əliyevin dediyi kimi:
"hər bir azərbaycanlı hansı ölkədə
yaşamasından asılı olmayaraq, Azərbaycan
dövlətinin, cəmiyyətinin problemləri ilə
yaşamalıdır, onların həlli üçün
mənəvi məsuliyyət hissi daşımalıdır.
Eyni zamanda, Azərbaycan hökuməti də elə bir
şərait yaratmalıdır ki, bütün dünya
azərbaycanlıları vətənimizin artmaqda olan maddi
və mənəvi dəyərlərindən, siyasi nüfuzundan
yararlana bilsinlər. Hökumətimiz bütün bunlardan
onların milli və vətəndaş hüquqlarının
müdafiəsi üçün istifadə etməlidir".