“Yeni Müsavat”. - 2009. – 24 fevral. - № 49. - S. 12.

BƏLƏDİYYƏLƏR HÖKUMƏTİN HƏDƏFİNDƏ

Yerli özünüidarəetmə orqanlarının qanunsuzluqları rəsmi qurumları dilə gətirib

Xəbər verdiyimiz kimi, 2007-ci il noyabrın 1-dən sonra bələdiyyələr tərəfindən satılan torpaqlar dövlət qeydiyyatına alınmayacaq. Daşınmaz Əmlakın Dövlət Reyestr Xidmətinin rəisi Arif Qaraşov ötən həftə jurnalistlərə açıqlamasında deyib ki, qanunsuz torpaqların rəsmiləşdirilməsi üçün vətəndaşlar Dövlət Torpaq və Xəritəçəkmə Komitəsi nəzdində yaradılan hərrac komissiyalarına müraciət etməlidir.

A.Qaraşov vurğulayıb ki, vətəndaşın bələdiyyədən aldığı torpaq üçün ödədiyi xərcləri nəzərə alınmaqla mülkiyyətin rəsmiləşdirilməsi üçün hüquqi forma tapılmalı və əhaliyə hüquqi yardım göstərilməlidir. O, həmçinin dolayısı ilə bələdiyyələri qanunsuz yolla torpaq satmaqda suçlayıb. Qeyd edib ki, bələdiyyələr torpaqları iki yolla satıb: birinci halda torpaqların qanunsuz satışı müvafiq orqanlarla razılaşdırılmayıb. İkinci halda isə belə razılaşma olub.

Xatırladaq ki, bir müddət əvvəl Dövlət Torpaq və Xəritəçəkmə Komitəsinin sədri Qərib Məmmədov da bələdiyyələri qanunsuz torpaq satışında ittiham etmişdi. Komitə rəhbəri dövlət, o cümlədən bələdiyyə mülkiyyətində olan torpaqların icarəyə verilməsində, alqı-satqı işlərində digər qanun pozuntuları ilə yanaşı, qanunvericiliklə müəyyən edilən növbəliyə əməl olunmadığını söyləmişdi. Q.Məmmədov deyirdi ki, “Torpaq icarəsi” və “Torpaq bazarı” haqqında qanunlarda torpaqların bilavasitə icarəyə, mülkiyyətə verilməsi ilə yanaşı, hərraclar və müsabiqələr vasitəsilə ayrılması nəzərdə tutulsa da yerli icra hakimiyyətləri, bələdiyyələr indiyədək torpaqların yalnız bilavasitə ayrılmasına üstünlük veriblər.

Diqqətə çatdıraq ki, ümumiyyətlə, son illər bələdiyyələrin adı Azərbaycanda korrupsiyalaşmış qurumlar arasında ön sıralarda çəkilir.

Ekspertlər deyir ki, bələdiyyələr bir çox hallarda özləri məqsədli şəkildə korrupsiyaya getmirlər: “Bakıda, rayon mərkəzlərində, eyni zamanda turizm üçün cəlbedici olan torpağın qiymətinin yüksək olduğu ərazilərdə bələdiyyələr özbaşına 1 kvadratmetr də torpaq sata bilmirlər. Digər tərəfdən, heç bir bələdiyyə sədri icra hakimiyyəti orqanının razılığı olmadan vətəndaşa torpaq sata bilməz”.

“Bələdiyyələr torpaqları sata və ya istifadəyə verə bilməzlər” yönündə səsləndirilən fikirlər düzgün deyil. Görünür, bu, müəyyən adamlara xeyir edir". Bunu qəzetimizə açıqlamasında Milli Məclisin Regional komissiyasının üzvü, millət vəkili Tahir Rzayev dedi. O bildirdi ki, torpaqların satışı və icarəsi zamanı qanunvericiliyin tələblərinə əməl olunmalıdır: “Qanunvericilikdən kənarda müəyyən hüquqi, normativ aktlar pozularaq bələdiyyə torpaqları verilibsə, təbii, bu hallar düzgün deyil. Fikrimcə, torpaq üzərində mülkiyyət hüququ bələdiyyəyə aiddirsə və bələdiyyənin mülkiyyətinə verilibsə, o torpağın sahibi bələdiyyədir. Ancaq 2007-ci ilin dekabr ayının 1-də ”Bələdiyyə torpaqlarından istifadə edilməsi haqqında" qanuna dəyişikliklər edildi. Qərara alındı ki, bələdiyyə torpaqları hərraclar, müsabiqələr yolu ilə istifadəyə, icarəyə və ya mülkiyyətə verilə bilər. Həmin dövr ərzində müəyyən hərrac komissiyaları, əsasnamələr hazırlanmalı, qanunvericilik aktlarına dəyişikliklər edilməli idi. Bundan sonra onun işlənmə mexanizmi hazırlanmalıydı. O dövrdə, əlbəttə, nəzərdə tutulurdu ki, torpaqlar verilməsin. Həmin müddətdə nəzərdə tutulan qanunvericiliyə uyğun olmayaraq kimə torpaq verilibsə, bu, düzgün deyil. Amma bundan əvvəl də bələdiyyələr torpaqları icarəyə, mülkiyyətə veriblər. Bunu kim deyə bilər ki, qanunsuzdur? Bəziləri deyir ki, bələdiyyələrin səlahiyyətləri dayandırılıb. Onlar torpaqları verə bilməzlər. Bu düzgün deyil".

Leyla ƏLİYEVA