“Bakı xəbər”-. 2008 – 27 oktyabr.- №234- s6

Silahlı Qüvvələr Baş Qərargahının strukturu müəyyən oldu

Baş Qərargahın yeni səlahiyyətləri NATO-ya inteqrasiyanı sürətləndirir

Məlumat verildiyi kimi, Azərbaycan Silahlı Qüvvələrində Birləşmiş Qərargahların yaradılması ilə əlaqədar Müdafiə Nazirliyi və Baş Qərargah arasında səlahiyyət bölgüsünə start verilib.

Verilən məlumata görə, Baş Qərargahın səlahiyyətlərini artırması onu, NATO ölkələrində olduğu kimi, yarımmüstəqil struktura çevirəcək, Müdafiə Nazirliyinin (MN) bəzi idarə və şöbələri bu qurama tabe olacaq. Məlumata görə, nazirliyin İnspeksiya İdarəsi, habelə Hərbi Komissarlıq bilavasitə Baş Qərargahın tabeliyinə keçəcək. Baş Qərargahın mövcud Təşkilati Səfərbərlik İdarəsi isə ləğv edilərək Hərbi Komissarlıqla birləşdiriləcək.

Qeyd edək ki, NATO İlə imzalanmış Fərdi Tərəfdaşlığın Fəaliyyət Planına (İPAP) əsasən, Müdafiə Nazirliyində aparılacaq islahatlar nəticəsində bir sıra idarənin ləğvi və birləşdirilməsi nəzərdə tutulur.

Müdafiə Nazirliyi mətbuat xidmətinin yaydığı məlumata görə, bölgü məqsədilə oktyabrın 3031-də Bakıda Müdafiə Nazirliyi və Baş Qərargahın G strukturuna keçidi ilə əlaqədar NATO-nun Ali Birləşmiş Transformasiya Komandanlığı Qərargahının ekspertlərilə Azərbaycan Müdafiə Nazirliyinin işçi qrupunun görüşü keçiriləcək. Görüşdə Baş Qərargah strukturunun, NATO ölkələrində olduğu kimi, Müdafiə Nazirliyindən ayrılması, eləcə də Müdafiə Nazirliyinin strukturunda dəyişikliklər, NATO strukturlarına uyğunlaşdırılması məsələlərinin müzakirəsi gözlənilir.

Məlumat üçün bildirək ki, G strukturuna keçid Müdafiə Nazirliyi və Baş Qərargahın təşkilati-ştat strukturunun tam şəkildə NATO standartlarına uyğunlaşdırılması deməkdir.

Beləliklə, bu islahatlar nəticəsində o, Müdafiə Nazirliyinə tabe olmayan ayrıca struktura çevriləcək Baş Qərargah Hərbi əməliyyatlar zamanı Quru Qoşunları, Hərbi Hava Qüvvələri və Hava Hücumundan Müdafiə Qoşunları, Sərhəd Qoşunları, Daxili Qoşunlar, Milli Qvardiya kimi hərbi birləşmələrin fəaliyyətini koordinasiya edəcək. Baş Qərargahla birgə Silahlı Qüvvələrdə Quru Qoşunları komandanlığının yaradılması planlaşdırılır. Türkiyədə və bir sıra digər ölkələrdə olduğu kimi, Baş Qərargah rəisi postunu rotasiya əsasında Quru Qoşunlarının komandanı tutacaq. Qeyd edək ki, hazırda Azərbaycanda Quru Qoşunları mövcud olsa da, bu qoşunların vahid komandanlığı yoxdur. Quru Qoşunları müxtəlif ordu korpuslarında və bilavasitə Müdafiə Nazirliyi nə tabe briqadalardan ibarətdir.

Yuxarıda sadalananlardan göründüyü kimi, aparılacaq islahatlardan sonra ordunun idarəçilik və tabelik sistemində ciddi yeniliklər gözlənir və bu, ilk növbədə, Baş Qərargaha aiddir.

Bu arada isə «Ayna» qəzetinin məlumatına görə, islahatlar nəticəsində Baş Qərargah özü altı əsas idarəyə bölünəcək. Onlardan birincisi Şəxsi Heyətin İdarə Olunması üzrə Baş İdarə adlandırılacaq. Buraya, əsasən hazırkı Tərbiyəvi İşlər, Hüquq, Təşkilat Səfərbərlik, Kadrlar və Hərbi Təhsil idarələri daxil ediləcək. Bu struktur Silahlı Qüvvələrin şəxsi heyətinin humanitar vəziyyətinə, onun psixoloji durumuna cavabdeh olacaq. Orduda nizamnamə hallarına riayət olunması, kadrların düzgün rotasiyası, yerdəyişmə və sair istiqamətlər məhz. Şəxsi Heyətin İdarə Olunması üzrə Baş İdarənin sərəncamında olacaq.

İkinci idarə isə Baş Kəşfiyyat idarəsi adlanacaq. Buraya Müdafiə Nazirliyində hazırda mövcud olan Kəşfiyyat İdarəsi və ona yaxın şöbə və bölmələr daxil ediləcək. Bu idarənin əsas işi kəşfiyyatla məşğul olmaqdır.

Növbəti idarə olacaq Baş Əməliyyat və Döyüş Hazırlığı İdarəsinə isə hazırkı Əməliyyat İdarəsi, Kadrlar və Hərbi Təhsil İdarəsinin bir hissəsi və ona yaxın olan bölmələrin daxil ediləcəyi bildirilir.

Bu qurum hərbi əməliyyatların hazırlanması, döyüşün keçirilməsi və sairə istiqamətlər üzrə məşğul olacaq. Dördüncü idarəyə, əsas etibarilə, Müdafiə Nazirliyində hazırda mövcud olan ərzaq, geyim, maliyyə, mənzil, tibb təminatı, pensiya üzrə idarə və şöbələr daxil ediləcək. Bu, Dəstək Qüvvələri Komandanlığı adlanacaq. Müdafiə Planlaşdırılması Baş İdarəsi adlanacaq növbəti quruma, əsasən, Hərbi Komissarlıq və Təşkilati Səfərbərlik İdarəsi daxil ediləcək.

Ən nəhayət, altıncı idarə Rabitə və İnformasiya Sistemləri Baş İdarəsi adlanacaq. Buraya hazırda Müdafiə Nazirliyində mövcud olan Rabitə, informasiya idarələri və mətbuat xidməti daxil ediləcək. Bu struktur Silahlı Qüvvələrin rabitə təminatına, qurumun informasiya siyasətinə cavabdeh olacaq.

Baş Qərargahın digər fəaliyyət növləri qərargahın xüsusi hissə idarəsinin rəhbərliyi altında gerçəkləşəcək.

O da bildirilir ki, NATO ilə Azərbaycan arasında ilkin razılaşmaya görə, Azərbaycanın müdafiə naziri gələn ilin əvvəlində «2009-cu ildə Azərbaycan Silahlı Qüvvələrinin Baş Qərargahında təşkilati tədbirlərin həyata keçirilməsi haqqında» əmr imzalayacaq. Məhz bu əmrin gerçəkləşməsi nəticəsində Azərbaycan Silahlı Qüvvələrinin baş qərargahı dünyanın aparıcı dövlətlərinin, o cümlədən NATO üzvü ölkələrinin silahlı qüvvələrinin baş qərargahları strukturuna uyğunlaşdırılacağı vurğulanır.

Beləliklə, bütün bunlar gələn il üçün Azərbaycan ordusunun idarəçilik sistemində tam yeni mərhələnin başlanacağından xəbər verir ki, bu da ölkənin NATO-ya inteqrasiyasında kifayət qədər vacib rol oynayır.

Fərid ABBASOV